2Jo | PMA | STEP |

2 Sion

Selusien koa helamu ten 2 Sion

Isei mutis selusien koanik?

Eiloheh Sion Sepeti mutis leta koanik katau en avong koa mutis 1 Sion, vesesal en ouh 90 AD.

Isei vuli selusien koanik mulamu?

Sion viteni keke mutis leta koanik min ‘atou koa Ahi rie lati vi onen ka min titan keil.’ En avong enek, meatin keil houlu amumoni keih en Kristin keil ven demkatien one, sakini Sion enrovattei vahit luvat isen meatin keil ka mul ling suain selusien onen en leta enek.

Sion mutis selusien koanik vensa?

Sion envati vasel kat Kristin keil evahathat keil eris — Sion mutis houlu usil envatien koa mal Kristin keil avatie lati min Kristin sav keil (1:5-6).

Sion envati vasel kat Kristin keil anousiltei tiser taliluvosien keil — Sion viteni keke koakeil arkultei anatin keke Iesu Kristo mita mai vi meatin anatin koa aven mul, keil arvitei Kristin anatin. Sakini, meatin keil onen Ahi irkur revitei tiser taliluvosien keil enek ka irkultei anatin en hihiseien keil one (1:7-11).

Mari rendemien tai ten selusien koanik mul en 2 Sion 1:9

Koakeil amul aling teisao en hihiseien keil onen Iesu Kristo, keil arkapiltei vatal min Ahi. Ka koakeil amusil kat varein hihiseien keil onen, keil akapil ral min Ahi Tata ka ral min Natnali.

Asa mul en selusien koanik?

1. Selkatien keke Kristin keil usil kat mengkatien ten envatien onen Ahi (1:1-6)2. Selkatien keke Kristin keil anousiltei koakeil hihiseien one usil Iesu Kristo romusiltei anatinien (1:7-13)

2 John

1 Inau, koa avise nau en Elda, namutis leta koanik.

Namutis va min Atou koa Ahi rie lati vi onen ka min titan keil. ^{▼▼1:1 Veni sakvisien keil avi houlu, Sion mul selus suai. Enrovattei vahiten isen meatin keil, sakini vise sios en 'Atou' ka Kristin keil en 'titan keil'.} Ekvat kami anatin, ka rovitei inau enges, koakeil emun koa akilea anatinien evat kami. 2 Veni anatinien enek mul enir, ka heles hetal minir lisenges.

3 Navisi keke Ahi Tata ka Natnali, Iesu Kristo, luhesan more envatien, enmahisien ka tomat onealu minir. Keil il en moulien orer navong ermulvathat ir ka romul romusil kat anatinien.

Selkatien keke Avousil Kat Sakien ten Envatien ka Hihiseien ten Anatinien

4 Navong nakur longlongien keke titami keil amusil kat anatinien suval koa Tata meng kati, nasi nau houlu. 5 Atou onak eli, tahos erhehathat ir. Asa koa namutisi venuk rovitei selusien hau. Vuo, kei vi selusien tai koa rokuri tuai navong rokur rohtoh en demkatien orer. 6 Rorie lat envatien koa vi anatin navong oualien orer musil kat mengkatien keil onen Ahi. Ka mengkatien keil koa miraengoni mulamu, navong mikur rohtoh en demkatien, vi koanik: oualien onami housil sakien ten envatien.

7 Meatin taliluvosien houlu aka vasi out netan, koakeil arkultei anatin keke Iesu Kristo mita mai vi meatin koa aven mul. Vati meatin koa mukonek vi uti liluvosien ka vi vativieh en Iesu Kristo. 8 Sakini, mihelei kat revi kami keke ui umen ten demkatien orer navuol. Anatin, mihelomal hekeih keke mihekur vasin ui umen ten demkatien onami.

9 Koakeil amul aling teisao en hihiseien keil onen Iesu Kristo, keil arkapiltei vatal min Ahi. Ka koakeil amusil kat varein hihiseien keil onen, keil akapil ral min Ahi Tata ka ral min Natnali. 10 Sakini, munak meatin etai mai ven kami koa hihiseien onen romusil kattei anatinien, minahisetei kei nasuval Kristin tuami tai, ka minakur revitei namai en teim onami. 11 Mihoumoni hemukonek veni kei koa mul kur revi vati meatin koanik hehi tuak onen, kei mul kapituai en tisaen keil koa mumoni.

Selusien Ekor

12 Nakur kat tounah houlu mahiteni min kami, ka ekrovattei matisi en leta tai. Ekvatimok masao en kami keke reheleles ir ka reheselus vituai. Hemukonek, ir vasi rehesi ir hehi houlu mok.

13 Titan Tukahin keil koa Ahi rie lati, keil emun aviten more one minuk.